舊年一度傳出肺部被感染引發纖維化，後來經理人證實佢因嚴重流感引致肺炎，要住進加護病房靜養。今日突然喺Instagram撰長文自爆原來佢早前健康出咗問題，每日都過得生不如死，仲半邊身麻痺，佢留言話。。。
現年37歲嘅台灣男歌手潘瑋柏，上月被爆搭上空姐新歡，並火速同居，戀情得意，事業都唔差，佢嘅世界巡迴演唱會將會喺今個星期六（21號）喺北京凱迪拉克中心登場，門票早前一推出被秒殺，照計潘瑋柏都冇咩好擔心。
不過，潘瑋柏舊年一度傳出肺部被感染引發纖維化，最後由其經理人公司華納大中華區總裁陳澤杉證實潘瑋柏因嚴重流感引致肺炎，要住進加護病房靜養，其後康復出院。開騷在即嘅潘瑋柏今日喺Instagram撰長文自爆原來佢早前健康出咗問題，每日都過得生不如死，仲半邊身麻痺，佢話：「2月過年的時候,我去了美國錄音，但在那每天過的生不如死。每天起床半邊身體從頭麻到腳，手指頭發麻，呼吸困難、血壓高、暈眩，而且感覺心臟不見了。
我以為是心臟病還是中風。晚上睡覺時都感覺過不了那晚。當時心裡很害怕再也看不到爸媽。」由於潘瑋柏唔知自己發生咩事，只係諗住撐到返台北再算，而佢有諗過延期或取消巡迴演唱會，直到上月初佢返台北入院接受檢查時，佢一度以為自己已經玩完，好彩有好多朋友都搵佢，幫佢打氣，而佢又諗到萬一放棄巡迴演唱會的時，會令到歌迷失望，所以靠意志死頂去開會同排舞，佢透露：「上海記者會我在台上其實已經快要昏過去，但也一直用意志控制。」
咁到底潘瑋柏患嘅係咩病呢？佢話：「遇到很多很關心病人的醫生，告訴我說這是自律神經失調的病狀，並給我對的藥物來控制。我現在終於可以恢復正常過每一天。」而佢仲喺文中特別感謝好友唐志中，每星期陪佢健身同鼓勵，又多謝歌迷嘅支持，佢話：「沒有你們，我可能真的就放棄了。」潘瑋柏仲貼出佢同朋友嘅對話截圖，見到佢當當時應真係好慌張，又擔心自己唔知出咗咩事，仲每日都覺得過唔到嗰日，嗰種擔驚受怕，隔住個mon都感受得到。
台灣《蘋果日報》搵過潘瑋柏經理人公司查詢，對方回應稱：「當時住院4天安排檢查，目前仍持續治療中，現他也為演唱會綵排，謝謝大家關心。」
(蘋果日報)
