20幾歲出道，今年9月就踏入半百之齡，但見佢外表同身形都冇乜走樣，一別就20多年：「其實我連護膚都唔多做，年紀大毛孔變粗我唔care，以前出道唱片公司包裝官仔骨骨，好多人有錯覺以為我係好貪靚，但我係最唔貪靚，當年嘅蔡興麟只係product，其實當時係唔開心，因為我唔係咁嘛！」
蔡興麟當年形象健康乖仔（蔡興麟提供圖片）
蔡興麟喺90年代出道，佢話最難忘係1993同2003年：「我第一個娛樂圈知己係黃家駒，佢幫我寫《為了你為了我》，如果冇家駒就冇今日蔡興麟，佢教識我好多嘢，冇幾耐佢出意外，同年因為公司close down令我重新諗方向，呢個係第一個打擊。」
估唔到，10年後，蔡興麟遇到嘅打擊係打孖嚟，佢話：「03年係雙重打擊，因為我從細到大偶像係哥哥同梅姐（梅艷芳），入行相識之後，佢哋對我好好，以前我個性好care評語，但佢哋教識我唔好被評語帶住情緒，佢哋唔止係我朋友，係我導師。」而哥哥同梅姐喺03年相繼離世。
初入行嘅蔡興麟希望得到全部人鍾意，但哥哥斷言冇可能。（蔡興麟提供圖片）
蔡興麟從小就封梅姐係偶像（蔡興麟提供圖片）
那些年偶像歌手其實都有一個唔拍拖嘅包袱，當年形象健康乖仔嘅蔡興麟，曾經發表獨身宣言——10年內唔會拍拖結婚，今日蔡興麟講番呢個逝去嘅諾言：「我係應承唱片公司，因為啱啱出道，自己希望將10年時間全副精神擺事業上面，因為當年自己都係10幾20歲，所以我答應呢個要求，我可以10年唔結婚，o依家大個咗諗番都好笑，你10年唔結婚，係咪代表10年唔拍拖？係兩件事，我唔拍拖做唔到，但起碼冇結婚囉！」
(圖片來源：蘋果日報)
o依家49歲嘅蔡興麟依然獨身，問到感情生活？佢坦言：「拍拖都有嘅，女朋友喺新加坡，我哋拍咗2年幾，但準備結婚就冇，自己好多時間喺國內，好多種種原因，隨緣啦！如果真係要結婚，以前有幾次機會，可能我係處女座，有人覺得我要求幾高，因為我係比較傳統思想嘅人，我每一次談戀愛都希望係結婚對象，結婚一定要付出所有，如果唔能夠畀到另一半所有，就唔適合結婚。」
(圖片來源：蘋果日報)
（Apple Daily）
