太極喺紅館舉行一連兩場「太極交響狂熱演唱會」，噚晚圓滿結束，搵咗許志安做表演嘉賓，安仔同太極合唱完《Remember Me》之後，安仔話呢首歌喺香港只係第二次唱，安仔仲好搞笑話：「我哋識咗好耐，我細細個就聽佢哋嘅歌長大，我想講呢句好耐，平時啲人都係咁對住我講同一番話。」
Joey嘅囝囝Justin喺台上表演完打鼓之後，到朱翰博（Ricky）solo，不過喺唱歌前，雷有輝叫佢介紹吓首歌，點知Ricky話：「唔講嘢得唔得？其實我唔係好識講嘢，係咁易講兩句喇！之前屋企發生好多事，令我有好大改變，好多謝我嘅朋友對我不離不棄，照顧我，係邊個朋友大家會明㗎喇！」之後唱出《我與太極一起走過的日子》，唱完之後，Ricky再話：「今次開心到爆，企喺度唱歌好緊張。」Joey講笑話：「大家知唔知佢講緊邊個朋友呀？唔知邊個係『呢個朋友』呢？」
安仔同Joey合唱《Remember Me》。
太極喺完騷後話大家都好唔捨得，問到Ricky係咪憑歌寄意送畀女友戴夢夢？Ricky即好尷尬咁話：「朋友囉！佢都係其中一個，唔好咁明顯啦！好肉酸，好多人都好照顧我。」隊友即笑話：「做乜今晚先特登講，係咪噚日俾人鬧？」Ricky笑話：「之前已經鬧，所以我噚晚特登唔講，有啲嘢估吓估吓都ok。」
Ricky好罕有喺台上多謝朋友對我不離不棄。
至於Joey係咪逼囝囝上台表演？佢話：「之前有問過佢，佢話唔想上台打，最後我安排到時間，我想佢上台，上得台就要對得住觀眾，我知阿仔要逼至做到。」佢自仲自爆喺綵排時，曾經當住好多人面前鬧仔：「不過佢好乖，個一吓忍咗我，返到屋企就慘啦！」有冇氹番囝囝？Joey笑話：「我哋攬住瞓覺呀！其實我噚日有同佢道歉，話晒佢就嚟去外國讀書，希望佢有個演出。」講到Joey之前有脂肪肝，佢笑話：「其實阿仔有份令我脂肪肝，佢哋好鍾意食甜品，我日日都陪佢哋食甜品。」
夢夢噚晚冇現身。(資料圖片)
Ricky唔肯講要多謝嗰個人係咪夢夢！
(Apple Daily)
