囡囡上月才1歲生日，唔聲唔聲原來又有咗！突然喺IG曬肚凸靚相報喜~不過佢就話今次係意外有咗，佢哋都歡迎嘅，但係冇預計咁快，預產期喺9月。。。
電影《一路向西》33C o靚模郭穎兒（Celia K.）前年結婚，下嫁圈外老公李冠鋒，去年生了囡囡李明芯，囡囡上月才1歲生日，Celia先喺社交網撰文做媽媽苦樂，佢感受到養兒方知父母恩，仲話會努力學做好媽媽，陪住囡囡成長。
話口未完，Celia今日喺Instagram貼出一張着住白色爆乳透視裝，仲肚凸凸嘅相片，佢話：「I didn’t say anything ?? but just tell you this was a photo taken two days ago.」Celia話呢張相係兩日前影嘅，明眼一睇就係有咗。
《蘋果》今日致電Celia，佢話：「係呀，o依家19周，意外有咗，我哋都歡迎嘅，但係冇預計咁快，預產期喺9月。」Celia日前先同老公同囡囡遊泰國返港，原來返嚟就病咗。問到佢呢胎陀B情況，佢話：「今次仲嘔得勁過上次，仲辛苦咗，可能上胎好近，一切歷歷在目， 今次仲要患咗腸胃炎，屙咗成個星期，瘦咗十磅，又唔可以食藥，只有飲電解質嘅嘢，希望身體好啲，快啲好番，不停大肚真係好辛苦㗎。」
Celia話肚中BB太細，未照到性別，下次產檢就會知道。為咗紀念再懷孕，Celia日前喺屋企影咗呢輯靚相，為美麗孕記留念，當然主角係佢啦，但囡囡芯芯被汽球吸引住，佢好雀躍玩埋一份。
(蘋果日報)
