本身佢本來係諗住感慨同朋友識咗30年超難得，但網民見到張相之後都錯哂重點，激讚：「原來細細個已經知道要守時！」、「小時候已經係小女神」由細靚到大真係冇得彈～
真的很犯規。犯規在佢嘅圖。呃Like就一定，但圖片往往生歧義，令人錯重點。好似上年聖誕（由舊史講起），周嘉儀明明想介紹下三款頭飾，仲親身示範，點知網民嘅重點都係去晒一對長腿。頭飾？乜有戴到頭飾咩？
又例如，今年初……身穿白色緊身衫嘅周嘉儀，用一個似笑非笑嘅表情（睇圖），呻年頭又係繼續不停食食食，結果塊面真係好似圓咗啲，仲問大家有咩減肥方法。
結果大家嘅焦點，又去錯晒件衫被「擴闊」嘅幅度。
今早，周嘉儀如常同大家講早晨，仲貼咗張三十年前嘅學生相，有感而發：「我嘅一年級同學尋晚send咗呢張相俾我，最記得以前每年小學旅行都係非常之期待，因為呢位同學嘅媽咪一定會整啲好好味嘅大菜糕俾我哋食。不知不覺原來我同呢位朋友已經識咗30年喇！望住張相好感動，一日朋友，一世朋友，亦不禁要講一句：青春多好！」
Hashtag係：多謝呢位朋友幫我勾起咁多美好回憶#光陰似箭#細個有對兜風耳好彩大大下變返正常#青蔥歲月永遠最開心身穿P.E.短褲仔嘅周嘉儀，小學一年級已經有一雙長腿？佢解釋番：「這張應該是四五年班，已經157CM」亦有人留言話：「原來細細個已經知道要守時！」、「小時候已經係小女神」……錯晒呀，人哋係講緊大菜糕同友誼咋！
（蘋果日報）
