超級鑽石筍盤「小小超」李澤楷以往身邊女伴車輪轉，之前同梁洛施拍拖，仲生咗三個仔仔，可惜最後都發聲明話共同分手。
呢兩年卻獨寵15年港姐季軍郭嘉文，前年兩人蜜遊日本爆戀情後，李澤楷唔單止冇避忌，仲越嚟越大方公開，日前愚人節李澤楷出遊泰國華欣，陪喺身邊嘅女伴繼續係郭嘉文，被讀者陳先生透過傳媒分享，證明呢位楷女郎暫時冇人可以取替。
陳先生喺電話表示復活節假期喺泰國華欣Oceanside Beach Club & Restaurant見到李澤楷同郭嘉文：「當時我哋啱啱去到餐廳坐低食飯，李澤楷嗰枱有五個人。我哋望咗兩眼，個港姐同女性友人就好緊張即刻匆忙離開。」從讀者提供相片所見，本來一頭長髮嘅郭嘉文轉look，剪咗及肩新髮型，着淺藍色露膊衫襯高叉迷你裙，清爽迷人，佢坐喺李澤楷對面嘅梳化位，手托香腮乖乖做聆聽者。
由讀者陳先生提供嘅圖片所見，李澤楷同郭嘉文食飯時坐對面，朋友反而喺兩旁。（讀者提供圖片）
郭嘉文同女友人走咗之後，戴住招牌圓框眼鏡嘅李澤楷，與身邊外籍友人繼續食飯傾偈，大約20分鐘後才離開，有兩枱人喺李澤楷離去時尾隨，唔知係咪李澤楷嘅貼身保鑣。呢間位於酒店嘅餐廳喺當地好出名，唔單只對住沙灘，餐廳裏面仲有泳池，當晚李澤楷點咗好多美食，大家邊飲白酒邊食邊傾，氣氛好愉快。
郭嘉文見到有人望自己，即刻變得好緊張。（讀者提供圖片）
郭嘉文其後更擰歪面視線，之後同女友人走先。（讀者提供圖片）
對於被讀者喺華欣「爆相」，記者聯絡李澤楷問到玩得開唔開心？同郭小姐感情好穩定，會唔會公開戀情？李澤楷以短訊回覆：「We are fine, thank you.」首度親口承認同郭嘉文好好；至於前度梁洛施就攜子返咗香港住，咁啱都係愚人節呢晚，被《蘋果》記者影到母子喺灣仔約友人食自助餐，同樣食得好開心。
(Apple Daily)
