佢話：「一直都冇動靜，好似自己唔得咁，樂趣都冇晒，o依家冇事啦。」佢仲話自從知道之後，都忍得好辛苦：「當日林奕匡嘅婚禮已經知道，好感激身邊同事，因為大家都知道，但係都尊重件事就冇問到。朋友上到屋企見好多孕婦食嘅產品都估到，但大家都冇講。」
陳柏宇（Jason）今日中午到商台為《口水多過浪花》擔任客席主持，頂替放假嘅余迪偉一個星期。節目一開咪，主持鄭裕玲話今次嘅主持係「boy」，但嚟緊會係「girl」，因為Jason喺Instagram宣佈同太太符曉薇（Leanne）一索得女。
Jason接受訪問時話會幫囡囡成立基金，因為好多人想做囡囡契爺、契媽，所以上契利是都會放入呢個名為「陳柏宇囡囡基金」。佢話自從知道太太有咗之後，都忍得好辛苦：「當日林奕匡嘅婚禮已經知道，好感激身邊同事，因為大家都知道，但係都尊重件事就冇問到。朋友上到屋企見好多孕婦食嘅產品都估到，但大家都冇講。」
講到由舊年6月試，到1月有小朋友，過去呢大半年太太都覺自己有變化，所以不停驗孕，所以買到成屋都係驗孕棒。回想過去6個月都冇聲氣有BB，令到自己心情都好緊張，佢話：「一直都冇動靜，好似自己唔得咁，樂趣都冇晒，o依家冇事啦。」
Jason話自己係好多嘢諗嘅人，會好擔心同諗好多唔好事情發生，佢話：「有時會諗，身體唔健全又有咩緊要呢。每一個人出世都有分別，最緊要係教佢出世接受呢件事，每人價值觀都唔同。噚晚仲發夢自己抱BB，仲係手上嘔奶，自己係好緊張但唔會畀太太知。」
講到Leanne初初懷孕時似有出血跡象，Jason都要佢即刻睇醫生，佢話原來有4成至5成孕婦有呢啲情況出現，食安胎藥就冇事，太太現在選擇性做家務。Jason透露太太預產期喺10月:「搵咗陪月，老婆想開刀，但自己屋企人想順產，收集意見中，如果順產我會入產房。」
(蘋果日報)
