憑《愛‧回家》一角人氣急升，今日同郭奕芯及丁樂鍶喺紅磡出席格鬥拳賽發佈會，提到佢早前承認同女友去旅行結婚，日前仲喺Instagram貼結婚相，今日問到婚禮詳情，Terry李偉健透露喺年底會擺酒，酒席已訂，暫定20圍，不過未有透露地點，佢話因為未婚妻為人好低調，唔想咁快講住，就算佢將早前喺日本影嘅和服婚紗相放喺社交平台，都要將太太個樣遮住。
李偉健仲笑住話：「佢好怕醜，我咪同佢講我又唔係周潤發，影完一次，鬼認得你咩！不過我講得多，返去有排受。」問佢到時會唔會向劇中舅父KC（歐瑞偉）同家姐林淑敏斟茶？佢笑謂：「我都有諗過，唔知呀，可能會啦！」
上過幾堂泰拳嘅郭奕芯，曾經遇過暴力事件，佢話：「以前試過有個男朋友飲醉酒之後，叉住我條頸打我塊面，打到我有一隻隱形眼鏡甩咗出嚟，我冇受傷，所以冇報警，之後我哋就分咗手。我覺得學打拳應該係純粹為咗運動，唔係打交同暴力，我鍾意男仔做運動操肌，會比較陽光，不過我o依家冇拍拖。」
李偉健話考慮斟茶俾KC。(資料圖片)
李偉健
(Apple Daily)
