一向來直腸直肚，好鍾意「指點」新人，有時仲會夾雜粗口。演過《屯門色魔》嘅藍國偉、《仁心解碼II》嘅變態色魔黎繼鵬、《封神榜》嘅雷震子、《阿旺新傳》嘅賓佬等，唔同類型嘅角色都演得入型入格。但近年李家聲拍嘅劇買少見少，去年更因整傷腳辭演《大帥哥》。
最經典嘅莫過於04年拍《學警雄心》，被指經常寸爆薛凱琪（Fiona），拍煞科戲時見Fiona做訪問就中途突入話：「做咩訪問呀？又講你啲歌唱事業呀？」搞到Fiona有啲尷尬，帶笑而過。
不過，入行30年嘅李家聲o依家可以開聲教後輩嘅機會越來越少，因為佢開工機會唔多，最近接演嘅劇集《金宵大廈》都只係其中一個單元嘅小角色。佢透露今年9月約滿無綫，都考慮離開。
李家聲演技多變，喺《阿旺新傳》扮賓佬，同《仁心解碼II》嘅變態色魔同樣入型入格。(無綫電視截圖/微博圖片)
佢話：「我都半退休啦，應該都唔制(唔簽)，睇吓啦，我哋嘅存在係幫公司，但冇位俾你做都冇辦法，我覺得唔好玩，冇嘢發揮，咁都要諗吓其他。」李家聲坦言樂見新人受教，佢話：「我教人都有樂趣，教多一個多一個，又帶唔到落棺材。但你唔擺我落去（劇集），我想講都冇得講，我都係想部劇出嚟好睇，唔想倒退咁核突。」
李家聲好注重健康，50歲仍操到好fit，活力充沛。 (微博圖片)
由於李家聲冇小朋友，又冇經濟壓力，口說已半退休，但心裏面對演戲仍有一團火。佢話：「我雖然就快52歲，但心境都係30幾歲，如果突然俾我做個一線位，我話一定得，因為仲有氣有力。但人講命運，唔一定靚仔就飛黃騰達，唔可以用咁心態困住自己，總之我知自己係level 5最top嗰個就OK。」
(Apple Daily)
