陳柏宇上年7月同女友符曉薇結婚，之後兩個都成日出雙入對，又不時晒下恩愛咁，早前佢哋兩公婆一齊出席林奕匡嘅婚禮，嗰時問到會唔會早過林奕匡生B，陳柏宇就好有信心咁話會，點知咁快就有好消息喇。
昨日陳柏宇喺IG貼咗一張超聲波相，仲話：「Guess what!」好明顯就係話有咗BB啦，而網民個個都恭喜佢做爸爸。《蘋果》問過陳柏宇，佢喺電話興奮表示：「非常之開心，Leane都好開心，詳情星期一會公布。」
據Jason好友透露，Leane懷孕滿3個月，BB喺泰國製造，今年1月Jason做完演唱會，同老婆去泰國享受二人世界，喺陽光與海灘下一擊即中。Jason曾經講過生仔女都冇所謂，Leane就好鍾意囡囡，據知首次懷孕嘅Leane唔係佗得超級辛苦，冇乜點孕吐，托賴情況好正常，兩公婆都覺得BB好錫媽咪，期待BB出世。
(蘋果日報)
