99年無綫藝員訓練班出身，粗略估計由入行到o依家拍咗超過100套劇集，不過真正俾觀眾認識，係拍完《同事三分親》、《畢打自己人》兩套處境劇，喺09年嘅《萬千星輝頒獎典禮》，趙永洪更有份提名飛躍男藝員，直到近期嘅《降魔的》嘅「些粉」一角，佢喺急症室嗰場爆喊戲，之後同龍貓喺的士前嘅生離死別，真係令唔少觀衆留下深刻印象！
就係呢場《降魔的》爆喊戲，獲網民真正注意，得到好多人讚賞
本來明年係趙永洪加入無綫工作20年，但係佢決定俾自己一個轉變，有消息話佢喺今年3月31號約滿後，決定唔續約向外發展。今日趙永洪接受《蘋果日報》訪問，承認自己已經回復自由身，佢話：「呢個決定真係諗咗好耐，其實公司一直俾咗好多演出機會，係一個好好嘅訓練場所，但係我都想試吓出去闖吓，希望努力會有好嘅成績，唔捨得一定會有，話晒喺呢間公司做咗差唔多20年，對住啲同事多過對住屋企人。」
趙永洪決定約滿離開無綫，向外發展。(資料圖片)
其實自從拍完《降魔的》之後，唔少觀眾對佢嘅認識係多咗，而佢選擇喺呢個時間離開，會唔會覺得係一個好時間？佢話：「都可以咁講，o依家叫做多觀眾認識咗，儲咗啲彈藥，你知做演員一向都好被動，我自己都抱住好正面嘅心態去做，亦都有信心可以再做好啲。」
趙永洪話佢已經簽咗俾蕭定一，希望可以全方位發展：「你都知我好爛做，乜嘢都撈，o依家除咗拍電影《暗黑者》之外，仲籌備拍一套網絡電影，試吓做導演監製，劇本已經七七八八，會係喺今年開拍。」
(Apple Daily)
