楊洛婷升呢人母後更散女人味，佢日前獨自攜女返加國探親，順便為媽咪補祝生日，今日佢喺Instagram貼出「四代同堂」照片，當中除咗佢帶住6個女大囡囡，仲有媽咪同嫲嫲，稱得上「四代金花」，年長嫲嫲89歲，小曾孫6個月大，楊洛婷今日接受《蘋果》電話訪問時話：「多謝呀，咁啱媽咪生日，我返加拿大同佢補祝生日，佢哋見到我囡囡好開心。」楊洛婷話加國生活優閒，空氣好，每次探訪完返港，皮膚會變差。
楊洛婷此行除探親仲去古巴玩，佢話：「我先返加拿大，放低囡囡畀媽咪湊，我同朋友去咗邁亞美同古巴玩。」產後火速修身嘅楊洛婷仲喪穿泳裝享受陽光與海灘，不用湊女，即變身「辣媽」：「我唔抗拒着泳衣。」
已有一女嘅楊洛婷有意再生小朋友：「最初想生完回復狀況，立即再生，但生完時我手指腳板關節痛，唧牙膏都唔得，睇中醫話入風，身體賀爾蒙失調，要針灸同食中藥調理，O依家已好番。」睇嚟楊洛婷隨時會再爆喜訊。
(蘋果日報)
