感情事，一向都係「剪不斷，理還亂」，就好似言承旭同林志玲咁，佢哋嘅關係一直都好撲朔迷離，去年11月就爆出佢哋世紀復合，跟住又傳出佢哋會喺峇里秘婚，但係疑團就喺林志玲日前到杜拜出席活動時解開咗，佢當時用咗四「沒」回應傳媒：「沒有懷孕、沒有結婚、沒去峇里島、沒有戀情」，即係話宣佈單身，踢咗言承旭出局。
而一直低調嘅言承旭，噚日就喺大陸跳水運動員秦凱嘅微博出現，見到言承旭同秦凱好親密咁搭晒膊頭影相，秦凱留言話：「姿姐(佢老婆何姿)的男神和姿姐的男人❗」
兩位當事人都現過身，咁今日就有台灣傳媒報道話有林志玲嘅好友代佢出頭，講番點解佢要咁決絕同言承旭劃清界綫喎！據報道所講，林志玲嘅好友就話自從言承旭同林志玲喺馬來西亞私會後，二人秘密復合本來係一件好事，但係男方就好似以前咁，成日玩失蹤，令到林志玲嘅心靈又再一次受傷。
好友仲透露話，林志玲原本都相信言承旭係有苦衷，偏偏喺呢個時候就爆出閃婚、懷孕等傳言，但係男方就一直未有作出回應，只係得林志玲承受壓力，獨自面對媒體，言承旭則依然故我，就係咁令到林志玲陷入進退兩難嘅不堪局面。除咗言承旭玩失蹤外，今年2月，林志玲因病要停工養病，佢好友就話其實林志玲病得咁嚴重，除咗係因為感冒，其實好大原因係因為「感情」壓力，所以林志玲同言承旭感情糾纏16年，都唔能夠開花結果，仲要喺復合後唔夠4個月，關係又再急轉直下，完全係有跡可循。
(蘋果日報)
