【本身唔諗住結婚】45歲古巨基:冇試人工受孕,不過…

    古巨基感情好專一,同助手老婆陳英雪(Lorraine)愛情長跑20年,4年前喺拉斯維加斯結婚,沒有愛得太遲:「佢話都冇諗過我係佢老公,我又何嘗唔係,冇諗過我老婆係咁,哈哈哈!我同古太又係工作夥伴又係心靈夥伴,每次演出我都有小習慣,出場前必需見到佢,我就會好踏實,佢要捉實我隻手講good show。」

    會決定結婚,全因Lorraine一次踩單車意外,令基仔改變不婚計劃:「因身邊朋友冇婚姻關係,其中一個要做手術,唔可以代佢簽紙,令我諗法改觀,唔好結得太遲!結婚之後唔係淨係得工作,好坦白講喺工作同生活上多咗平衡,唔好以為我冇出現,梗係飛咗去做嘢,其實我可能係同老婆拍吓拖,有時幾矛盾,好多朋友都話快啲造人,咁造人其實唔可以咁密集工作,唔可以咁攰,所以我嘅產量放緩咗。」


    結婚快4年,45歲基仔期待做爸爸:「我哋都鍾意小朋友,但明白呢件事唔可以有壓力運作。」有冇嘗試人工受孕?基仔坦言:「冇吖,不過有好多介紹例如食療調理身體,中藥嗰啲,暫時仲係二人世界。」

    (蘋果日報)

    SHARE