娛樂圈有個現象，呢度出現過啲人，總會來回又折返。佢就係其中一個，一度活躍於90年代嘅娛樂圈，02年突然退出幕前，轉戰幕後做藝人形象顧問，06年結婚，兩人育有一子，14年宣佈結束9年婚姻，之後。。。
37歲何嘉莉一度活躍於90年代嘅娛樂圈，呢位「高妹」96年參演電影《四個32A和一個香蕉少年》出道，跟着成為英皇小花，02年突然退出幕前，轉戰幕後做藝人形象顧問，06年下嫁首任丈夫、甜品大王黃逸璋，兩人育有一子，14年宣佈結束9年婚姻。翌年底，何嘉莉低調跟飛機師Gerald Sze再婚，去年誕下囡囡。何嘉莉今年重返英皇娘家，簽約做KOL。何嘉莉日前接受《蘋果》專訪，講起「復出」，佢話：「我唔可以停低落嚟，我鍾意做嘢。」
潮流興做KOL，何嘉莉絕對有條件，佢可同時分身兼顧家庭。轉戰幕後16年，何嘉莉無怨無悔：「我當初的而且確係唔想做（做藝人），好大壓力，冇自由，我本身好鍾意自由，好想試唔同嘅嘢，想趁後生試唔同工作，so far咁多年試到，例如styling、時裝設計，我又去咗讀fine art，又結到婚，有小朋友同自己家庭，未必遇上o依家老公，生埋小朋友，咁快做到。呢啲係我呢十幾年嘅得着，好幸福嘅嘢。」
人妻何嘉莉堅持重新出發都必要家庭為重，「仔女仲細，佢哋需要我去照顧，唔可以掉低佢哋，拍劇太困身，我會錯過咗好多嘢，衡量過，暫時KOL呢個方向幾啱自己，即使我拍條片，小朋友喺隔離都唔緊要，唔會影響工作。」KOL可以隨時隨地分享扮靚或湊B心得。
何嘉莉最近再次踏出幕前，獲邀喺無綫節目《流行經典50年》開金口唱出《兩種人》，到底何嘉莉係咪仲有要追嘅少女夢嗎？「我好鍾意唱歌，但我知我唔係一好好嘅entertainer，我性格唔得，唔能夠圓滑處事，最近去電視台唱歌都補番當年遺憾，止到歌癮。嗰次演出都好大壓力，要顧住唔好甩歌詞、唔好發台瘟、唔好走音，表現又要好，樣又要靚，好多嘢諗，好煩，做歌手壓力大，o依家又好多新人，做KOL似乎輕鬆啲。」
問何嘉莉可是「虎媽」？佢話：「一睇我就知唔係，我係好hea嘅，我自己都唔想經歷多一次，我當然唔會叫子女做，我叫佢哋做咪即係叫我自己做。」何嘉莉話要確定子女興趣，才會讓佢哋讀興趣班，否則強迫子女去學，最終佢自己受害。
佢不會望子成龍：「即使讀醫，某程度都講天份，唔係個個死讀都做到醫生，我覺得囝囝藝術家啲，最近開始畀佢學畫畫，不過音樂天份佢遺傳唔到，佢話鍾意打鼓，等佢大個啲先，打鼓都有型。」
(蘋果日報)
