之前掛住生B的吳若希，見新一姐來勢洶洶，亦驚青同公司拍晒心口表示年中會由澳門搬返香港住，更押後生第二胎！
入行25年，已經貴為TVB雙料視后的田蕊妮，踏入40歲，決定重返樂壇做歌手再出碟，無綫首席花旦升呢做埋星夢娛樂一姐，阿田更獲公司全面力撐，特許她今年停劇瞓身錄碟，更落重本力谷她殺入樂壇。
06年由亞視殺入TVB ，田蕊妮在13年憑《巨輪》奪台慶頒獎禮雙料視后，演技被肯定，但其實阿田一直有另一心願，是希望得到觀眾認同她一樣唱得。
田蕊妮93年參加亞洲電視舉辦的「未來偶像爭霸戰」，憑演唱關淑怡〈一首獨唱的歌〉摘下金獎。
早於93年田蕊妮已對唱歌充滿理想，參加當年亞洲電視舉辦的「未來偶像爭霸戰」奪得金獎，可惜當時亞視未有唱片部門，令阿田冇機會出碟，反而轉去拍劇，95年拍第一個劇《縱橫四海》演技受讚，從此劇集一部接一部，觀眾似乎亦忘記了她當年是歌手出身。
停劇一年錄碟
據知情者透露：「阿田呢幾年喺無綫發展真係好順利，但佢對當年未有出碟一直耿耿於懷，佢一路都好想再出碟做歌手，雖然14年得Paco(黃柏高)賞識佢，簽咗太陽城娛樂出過一張唱片，但嗰時佢喺無綫上緊位，劇接劇冇停過，根本冇時間宣傳爭取更好成績！佢覺得嘥咗機會，覺得好可惜！」
吳若希 延後生B
田蕊妮加入星夢做一姐，曾經是公司頭寵的吳若希，之前因為掛住結婚生女，老闆何哲圖又錫佢，畀佢生完BB放足半年產假，但咁啱嗰時新人菊梓喬彈出，公司自然全力力谷，吳若希見菊梓喬上位，自己嘅地位受動搖，自己再唔努力聽執包袱：「佢知道公司簽咗阿田嚟緊仲會出碟，已經好緊張，驚公司唔睇佢，即刻答應老闆話遲啲會搬番香港住，會放番重心喺香港發展，仲會延後生B，咁話晒阿田係無綫一姐，佢明知公司今年會將資源擺重阿田度，都同公司講話想去拍劇，諗住多一條出路囉！」
去年四月誕女停工休息的吳若希，一度失勢被公司新人菊梓喬搶晒風頭，上年10月才急忙復出收復失地；但近日又得知星夢會全面力捧新一姐田蕊妮，寧願同老公分居，都全面搬回香港搏殺，更即要求公司畀佢拍劇，5月入劇組拍《多功能老婆》！
（sina / sundaymore）
