噚日沈卓盈嘅34歲生日，雖然好慘豬咁病咗，但係佢就過得好開心喇！點解？只要大家去佢嘅ig度睇吓就知啦！
今日凌晨，沈大師就喺ig度貼咗幾張相，見佢好誠心咁喺度許願，除咗生日蛋糕，身邊仲有一束紅玫瑰，佢留言話：「他生病時我給他煮飯，現在到我生病了他給我煮了一頓生日飯，由6:30煮到10:30，其實我知道他還沒有病好～謝謝你為我預備的一切！」
真係好Sweet呀，男友Calvin為咗同佢慶祝生日，花咗4個鐘頭煮一餐飯，睇到佢貼出Calvin嘅製成品，都相當吸引，真係隔住個mon都流晒口水，唔怪得沈大師咁冧喺ig度發表「愛的宣言」啦！
除咗感激男友為佢預備生日飯，沈大師留言亦有多謝家人，佢話：「今年又大一歲了，每年我的生日願望都是希望家人和自己愛的人身體健康，每日都開開心心，今年也不例外，我愛我的家人，也很感恩在我的生命裏有你們的陪伴同愛護，因為有你們我覺得生活每分每刻都充滿愛同幸福感，謝謝你們！」
問到沈大師嘅生日願望，佢今日回覆傳媒：「我希望今年大家可以就到時間全家一齊去旅行，身體健康最重要，我病咗成個禮拜。」
沈卓盈今年生日抱恙，雖然冇五星級餐廳美食，但男友卻細心為壽星女煮愛心龍蝦餐，有花又有蛋糕，沈卓盈當然冧爆，也食到舔舔脷，佢大讚男友廚藝：「100分，因為心思加誠意。」沈大師感動男友為佢炮製生日餐，佢話：「佢未病好，之前佢病我煮，今次我病到佢煮。」咁夾不如結婚啦，沈卓盈話：「隨緣。」
查實去年沈大師生日嘅時候，都有喺ig度晒愛㗎，佢就貼咗一張戴住情侶戒指嘅手，揸住酒杯嘅相，公開認愛Calvin之外，仲以為佢哋好事近㖭！
(蘋果日報)
