喺處境劇《愛．回家之開心速遞》裏面，飾演「紅衫魚」嘅蘇韻姿同「池子孝」嘅阮政峰被傳戲假情真，有《蘋果》讀者喺中環捕獲佢哋，同場仲有另一對情侶，「Bonnie」林凱恩同「金城安」周嘉洛，但係阮政峰同蘇韻姿都冇承認戀情，堅稱只朋友關係！
今日有周刊報道，雖然阮政峰經常孖住蘇韻姿喺網上放閃，呢對戀人都好受觀眾歡迎，不過查實同阮政峰拍拖嘅另有其人，真命女友就係安仔嘅女友Bonnie，即係林凱恩。
報道仲話佢哋四個喺劇中有唔少群戲，過電嘅只係阮政峰同林凱恩，但係為咗唔影響工作，所以佢哋決定低調戀情，每次出街都搵安仔同蘇韻姿做煙幕。
直到日前佢哋被人影到收工離開電視城，林凱恩好自然咁坐咗喺阮政峰架車嘅司機位旁，反而蘇韻姿就自己揸車走人，意外令身份曝光！
其後有傳媒向林凱恩同阮政峰了解，不過佢哋都話：「唔好意思，唔太方便回應你哋公司。」
(蘋果日報)
