第五年擔任「愛彼女皇盃大使」嘅李嘉欣，最近影咗輯限量版紀念腕錶宣傳照，仲做咗個專訪，謂好期待嚟緊今個月29號舉行嘅愛彼女皇盃賽馬日，笑言老公許晉亨知道佢再任活動大使，仲開心過佢：「影宣傳相嗰陣，我都係咁Send相俾佢睇。」
今年是第20屆「愛彼女皇盃」，20呢個數，同李嘉欣又好有緣。「我生日日期係20號，諗番自己20歲嗰年啱啱入行開始拍戲，當時覺得做演員好好玩、感覺好新鮮好好奇。」仲話20係佢lucky number，可以帶埋啲luck俾當日參賽馬匹添。由錶講番馬，李嘉欣同家人都係馬主，佢名下嘅馬匹，都以「寶」字命名，最近仲多咗一匹：「最新一匹叫『陸寶』，都係沿用之前一系列馬名，馬係我哋寶貝，囝囝Jayden就係家中三寶。」
至於許氏家族，同馬匹淵源更深，李嘉欣稱：「老爺（許世勳）1957年憑『誘惑』贏得佢做馬主之後首場頭馬，今年1月10號『獻惑』勝出跑馬地賽事，令他成為歷來首位喺香港取得100場頭馬嘅本地馬主，我哋全家都好開心，希望未來可以贏更多頭馬啦！」
除咗多咗匹馬，李嘉欣透露屋企仲多咗個新成員，仲係一多就多兩個：「我哋成家都好鍾意動物，所以再飼養咗一隻貓同一隻狗。初時都驚佢哋夾唔嚟，但經過一段時間磨合之後，雖然彼此性格好唔同，但都成為好朋友！有時候隻狗落咗街散步，隻貓會悶悶不樂，應該掛住佢啦。」
(蘋果日報)
