陳茵媺（Aimee）剛過咗37歲生日，一班好姊妹曹敏莉、劉倩婷等輪流為佢慶祝，但正日當然要留返同屋企人過啦，大小情人都送咗花，Aimee仲好開心喺ig分享喜悅，透露老公喺屋企整咗好多汽球，晚上仲去食新鮮日本空運魚生！
Aimee話最好嘅生日禮物就係老公陳豪可以全日陪住佢，因為大家都好忙，所以能夠爭取時間見面已經好開心。
Aimee生日前一日，陳豪同Aimee就抽咗少少時間拍拖行傢俬店，成功爭取二人世界。日前《蘋果》讀者鄧太就透過「爆相爆片」，表示當日下午一時半，喺沙田嘅IKEA遇見陳豪同陳茵媺，但就唔見三個仔女同工人同行。
陳茵媺戴cap帽化淡妝，陳豪就着短褲戴口罩，但最易認就係佢嘅招牌髮型，紮咗條辮仔，一眼就望到。讀者鄧太話：「見佢哋買咗幾袋嘢，但仲行咗去櫃枱同職員訂咗啲貨，之後就排隊俾錢。」
其間都有唔少人認得陳豪兩夫婦，鄧太話都冇咩親熱動作：「拖手都冇呀，俾完錢就由陳豪負責拎晒啲嘢，跟住就去咗。」
(蘋果日報)
