今早深水埗發生咗一單駭人嘅虐狗事件，一名23歲男子疑從大廈高處將一頭白色銀狐犬掟落街，狗狗分開兩截當場死亡命，而有指被掟落街嘅銀狐犬，原來之前都發生過被遺棄嘅唔開心事，早於上月31日，狗狗就被發現喺尖沙嘴廣東道太平洋會對出墮海，事件亦被愛護動物協會證實，當日被水警救起的銀狐犬，與今日疑死在主人手裏的為同一狗狗，實在令人婉惜！
姚子羚(ig圖片)
香港一直以來都未有對訂立完善嘅《動物保護法》，多年來好多愛護動物人士都不遺餘力咁去爭取，希望藉着立法去提高港人保護動物嘅意識自然，減少虐待動物嘅的情況出現。可惜爭取多時，都未見動保法例嘅曙光。今日又再發生一件虐狗事件，圈中好多愛狗藝人都感到無限欷歔。姚子羚多年前曾收養一隻被遺棄的唐狗「通仔」，於16年子羚雖然被通仔噬傷面珠，差點毁容，但她仍對通仔不離不棄，對於今日發生掟狗落街事件，子羚話：「我都有留意呢件事，我冇諗過之前俾人掟落海嗰隻狗狗，原來就係俾人掟落街嗰隻，以為喺海裏面救番，可以逃過一命，點知死得仲慘，真係好心痛，希望可以喺呢方面加強番啲法例，去保障番啲動物，我覺得我哋係冇權去剥削佢哋嘅生命。雖然我知道未必每一個人都係愛小動物，不過就算你唔愛，都唔好傷害佢哋。」
江美儀(資料圖片)
一向愛狗如命嘅江美儀，佢知道事件後就話：「每次見到呢啲新聞都好嬲，我估計之前狗狗墮海，都唔係狗狗唔小心落海，o依家仲要掟隻狗落街，真係好想佢死？如果真係想唔要有好多方法，無權去終結佢嘅生命。」同樣有養小動物嘅吳日言、江若琳同譚小環都對事件感到震驚。吳日言話：「覺得好多人因為壓力大發洩喺動物身上，但咁樣對自己嘅狗都好震驚，至於嗰個主人係咪有精神問題就要警方去查。
吳日言(fb圖片)
不過，覺得小動物真係成日會遇到呢啲欺凌事件，希望唔好再有咁嘅事發生。」江若琳則說：「今日見到單新聞，我覺好恐怖，好震撼，隻狗仔好慘，接二連三畀佢最親主傷害，小動物咁可愛，有乜咁大仇口要咁，如果唔鍾意小動物，或情緖有問題，做乜搵佢哋發洩，佢哋好無辜，希望政府可立例嚴懲，成日見到虐畜新聞我真係好嬲，佢哋咁善良，無傷害性，仲要自己養，令人好氣憤。我覺得要嚴懲，唔好畀佢哋覺小罪行，其實好邪惡，動物都係小生命，同謀殺冇分別。」而譚小環就話：「呢件事等同謀殺一樣，希望政府立例，畀多啲人知，小動物都有生命，不可以亂來，小動物有權利生存，亦希望教育下一代養寵物要做個負責嘅主人，唔可去謀殺小動物，狗狗無罪。」
江若琳(資料圖片)
譚小環(資料圖片)
(蘋果日報)
