宋熙年同陳智燊（Jason)前年結婚，婚前婚後sweet爆燈，過咗一年幾嘅二人世界，佢哋已準備為屋企加添新成員，噚晚分別喺社交網公布喜訊，家中將有「Boss Baby」，佢哋公佈喜訊，依傳統陀B三個月後先講得，即係佢哋Boss Baby預產期應該係今年10月。
宋熙年噚晚忙開工，半夜返家已攰爆，加上懷孕身體狀況變化，身體比較疲倦，宋熙年今日回覆傳媒，問到佢身體情況，可有孕吐？佢話：「BB好乖，所以唔太辛苦。」老公Jason有冇照顧周到？宋熙年即甜到漏回應：「佢好貼心照顧，我哋好開心，懷孕感覺好奇妙。多謝大家祝福，會好好照顧自己。」
兩公婆一向喜歡小朋友，到底第一胎想要仔定女？宋熙年稱冇所謂：「最緊要健康。」咁準備剖腹定順產？宋熙年就賣關子：「好多東西嚟緊要考慮同安排，到時話大家知。」
(蘋果日報)
