恭喜晒！上月先至放聲氣話同老公陳智燊努力造人，仲話：「好快，努力中，希望生到狗BB！」
終於如願以償，昨晚九點，兩公婆分別於ig貼圖，宣佈：「we’re proud to announce our 2018 Sarah and Jason Production…… coming to a pram near you soon (nearer us haha)」
BB車上面仲有車牌BOSS BABY，未出世已經做Boss喇！相中陳智燊仲好肉緊咁一邊啜太太面珠，雙手輕按太太腹部，好甜蜜！
宋熙年就話：「We have a new boss in the family, arriving soon..」其實陳智燊兩公婆一直都好鍾意小朋友，2016年9月結婚後，博命搵銀儲奶粉錢，仲話：「自私啲講，我都想sweet sweet吓先，去多啲旅行，生咗小朋友，Jason會日日對住佢笑唔記得我。」
過咗兩年二人世界，就要開始努力喇。去年底兩人一齊出席一個孕婦產品活動時，已經話會「學以致用」，不過就投訴老公太忙，仲打趣謂可能去到某啲「關鍵日子」要幫老公向劇組度期嚟「造人」，講到咁白，嚇到陳智燊都好尷尬咁話：「嘩，你講到咁揚呀！」
至於生幾多個，陳智燊就話希望第一胎生孖胎，宋熙年都話覺得孖胎、甚至三胞胎都接受：「總之係自己仔女都會鍾意！」咁就要加油喇！
(蘋果日報)
