四太梁安琪一家去曼谷過復活節假期，細仔何猷君帶埋超模女友奚夢瑤同行融入何家，《蘋果》今日致電四太，佢表示此行好玩，佢話：「都係行吓街、食吓嘢，不過都係玩咗兩、三日，今日都要返工。」
23歲賭王何鴻燊四房公子何猷君同29歲大陸超模奚夢瑤嘅姐弟戀打得火熱，去年11月兩人蜜遊東京被爆戀情，啱啱復活節假期，原來猷君孖女友出巡曼谷吃喝玩樂，同行仲有媽咪四太梁安琪、哥哥何猷亨、家姐何超盈，被讀者劉先生透過「爆相爆片」分享，可見奚夢瑤已經融入四太家，成功過咗未來奶奶呢關啦！
劉先生接受電話訪問表示：「嗰晚大約7點，喺Siam Paragon首先見到奚夢瑤，後面就係四太一家人，佢哋喺商場搵地方晚餐，四太入咗一間cafe，奚夢瑤陪佢入去坐低，但何超盈好似想食其他嘢，三個仔女繼續去搵好食嘅餐廳，之後猷君返嚟帶四太同女朋友去會合何超盈。」佢哋坐低咗又轉場？劉先生話：「泰國服務員都幾好，我覺得佢哋冇尷尬，坐低咗兩分鐘左右，後來起身走。」現場見到四太表現對奚夢瑤滿意嗎？劉先生形容：「奚夢瑤對四太比較殷勤，四太喺cafe坐低，只有佢跟埋入去，仲幫四太拉櫈。」
啱啱復活節假期，原來猷君孖女友出巡曼谷吃喝玩樂。（讀者提供圖片）
同行仲有媽咪四太梁安琪、哥哥何猷亨、家姐何超盈。（讀者提供圖片）
讀者劉先生形容：「奚夢瑤對四太比較殷勤。」（讀者提供圖片）
講到對奚夢瑤嘅印象，四太有讚冇彈：「佢係好女仔，好有上進心，做嘢頭頭事道，好細心，佢好忙，佢同猷君喺第二度飛嚟，呢個女仔真係幾好。」問到係唔係覺得猷君揀得好，佢就笑言：「佢好眼光，但要睇番有冇福氣，佢哋係唔係拍拖就問番我個仔。」而據讀者喺曼谷現場所見，奚夢瑤確實好識做，對四太特別殷勤，四太喺cafe坐低，只有佢跟埋入去，仲幫四太拉櫈，咁細心，難怪咁得長輩歡心。
(蘋果日報)
