現年27歲星二代、郭秀雲同前夫錢小豪所生嘅囝囝龐景峰，因為母親改嫁龐杰，龐景峰也跟後父姓氏，佢遺傳咗父母演藝細胞，一直好想喺影壇有一番作為，龐景峰狂練打拳想拍動作戲，佢亦喜歡唱歌，近日Youtube上載咗新歌《UP IN THE AIR》MV，當中佢係同女主角又攬又錫，足足錫咗7次，23歲學生妹新歡Peggy睇完當然嬲豬，龐景峰呢排有空就陪Peggy補鑊。
龐景峰出道至今，桃花極旺，佢日前仲被發現一拖三喺中環Sevva嘆high tea，睇真啲正印Peggy原來都喺度，熱戀情人仲排排坐，相中所見，龐景峰對Peggy好細心，仲會主動為女友遞上甜品，女生都嗜甜，相信佢用甜品餵飽Peggy，等佢甜晒「中和」醋意。Peggy日前就喺Instagram貼咗吃甜品相，右手中指仲戴上戒指好搶眼。
景峰近日Youtube上載咗新歌。（影片截圖）
《蘋果》今日打畀龐景峰，佢直認新MV中咀咗韓妹女主角7次，令女友Peggy睇到眼火爆，佢話：「計埋NG唔止7次，不過當時拍MV，我未同Peggy拍拖，佢一睇咗我嘅MV，就話不如首歌改名《Thousand Kisses》，詐我好耐型。我傳畀朋友share個MV，佢好抗拒話『我唔係你fans，唔使傳畀我』，仲問我知死未。」
當中佢係同女主角又攬又錫，足足錫咗7次。（影片截圖）
龐景峰出道至今，桃花極旺，佢日前仲被發現一拖三喺中環Sevva嘆high tea。23歲學生妹新歡Peggy睇完當然嬲豬。（影片截圖）
龐景峰出道至今，桃花極旺，佢日前仲被發現一拖三喺中環Sevva嘆high tea。
睇真啲正印Peggy原來都喺度，熱戀情人仲排排坐。
龐景峰當然知驚補鑊，連日有空就氹番Peggy：「o依家日日係情人節，我盡量想日日都畀到佢surprise。」龐景峰同Peggy拍拖半年，佢早已帶女友見家長，媽咪郭秀雲鍾意到不得了，龐景峰話：「Peggy煮嘢食好叻，我媽咪唔識煮，媽咪話歡迎到Peggy搬埋入嚟住算啦，咁我就日日有住家飯食。」龐景峰話有意稍後再拍新歌MV，一定預女友演出。
龐景峰對Peggy好細心，仲會主動為女友遞上甜品。
(蘋果日報)
