【8個月巨肚】第三任準爸爸：會一視同仁

結婚8年，育有6歲長女高純意同4歲二子高神悅，兩個未夠數，佢哋決定為四口之家再添新成員，三女即將下月出世，前日係醫生太太陸凱兒生日，今年佢挺住8個月巨肚慶生，意義唔同，所以特別全家影了大肚全家福留念。

陸凱兒喺Instagram貼相分享，佢喺巨肚上畫上大小心心，示意母女同心，廿四孝老公高皓正則蹲下攬實老婆示愛，大晒溫馨，壽星女陸凱兒留言：「今年的生日很特別，因為有肚內的囡囡陪我過生日！之前的兩個小孩也沒有在我的肚子裏陪我過生日。謝謝大家的生日祝福！」佢哋全家福照片都好有愛，全家笑容一致。

高皓正今日接受傳媒電話訪問，第三任準爸爸興奮咁話：「囡囡預產期係5月1號，今次都會係順產，太太有過生兩胎經驗，預計會早少少出嚟。」高皓正話長女二子出世，醫生都沒安排佢剪臍帶，今胎佢都只係陪入產房打氣同拍片：「交畀專業人士去剪臍帶，我都好驚，拍片算啦，我會陪老婆傾偈，分下佢心。」高皓正表示家中一對子女已期待妹妹到嚟，佢話：「只係細佬冇做哥哥經驗，佢哋o依家見到人哋BB都搶住抱。」高皓正強調唔會接孻女拉心肝，佢話會一視同仁，三名子女都咁錫。問高皓正買好BB嘢未，佢話會環保重用朋友嘅嬰兒用品：「收集咗番嚟，都整理好晒。」

高皓正笑言老婆今年20歲生日，咁係咪送咗20份禮物畀老婆，佢話：「多係冇用，一份就夠，係心意。」

(Apple Daily)