今日4月1日唔只係愚人節，仲係藝人林盛斌（Bob）入行15年嘅日子，一改搞笑形象嘅佢，喺Instagram感性發千字文，佢留言話：「2003年4月1日，係我加入電台第一日，原來，不經不覺，今日，係我入行15年。」
阿Bob好感觸咁話「無論係電台、電視台、電影到出面撈嘢，做主持、做司儀為咗有效果、為搞氣氛，都會去玩吓人、寸吓人」，又成日整蠱做怪肉肉酸酸，又自嘲「又冇樣冇款冇才華，淨係聲大大冇貨賣」，所以其實唔係個個都鍾意佢同接受到，有時見到網民爆粗留言又話「不知所謂，小丑一個！」，仲拉埋佢家人落水：「好憎你全家人呀，一齊死咗去啦！」佢都心諗：「嘩，咩事咁大仇口呀？」
不過有人唔Like當然都有人撐，佢好感激有網民留言支持佢，見到佢又好開心邀合照，讚佢「你主持嗰個乜乜乜節目好好笑呀！」、「哈哈，見到你個樣就覺得好開心！」、「你d（啲）女女好得意，好可愛呀！」等等，佢笑言「寫到呢度突然有少少眼濕濕……」佢衷心多謝每一位為佢打氣甚至打擊佢嘅人，令佢好好反思，繼續推動自己。
（資料圖片）
最後佢就話：「我知道冇可能取悅所有人，我只好盡力去做好自己。我會不斷學習，希望進步，我會繼續努力，一直加油。」
佢坦言有人鍾意佢亦有人憎佢，會盡力做自己！
而大部分網民留言都叫佢加油，仲有人打番千字文讚佢，話全家都鍾意佢，小朋友叫佢做「無頭髮叔叔」，唔知阿Bob睇完網民啲留言會唔會再眼濕濕呢？
(on.cc)
