藝人胡定欣（Nancy）最近去咗浙江省橫店為無綫劇集《包青天再起風雲》拍外景，佢不時都會晒相同粉絲分享一下喺橫店嘅最新近況，生活似乎過得相當充實！呢日，定欣就上載咗兩張同一個男人嘅合照，仲留言：「相信10幾年前我地（哋），一定沒有諗過今日會喺橫店明清宮前拍照留念😂 #睇你件衫都知你掛住我架（㗎）啦！」
兩人喺橫店明清宮前影相。
定欣仲話Kenny着咗件反「N」Tee（N字係定欣英文名Nancy嘅開首字母），一定係掛住佢！
大家估吓呢個戴黑超嘅男人係乜水？估都估唔到……原來係北上發展已有一段時間嘅關智斌（Kenny）呀！相中定欣仲同Kenny搭晒膊頭影合照，唔少網友都感到好驚訝，有人仲留言：「識㗎？！」
定欣喺橫店感受馬拉松賽嘅熱鬧。
其實Kenny喺2013年曾被東網影到與張敬軒（軒仔）、胡蓓蔚、胡定欣與其當時男友沈栢淳食飯，Kenny同軒仔一向關係好就係人都知，而胡蓓蔚就係軒仔嘅契姐，加上胡蓓蔚同定欣又係閨密，所以Kenny與定欣係Friend底，究竟係咪純粹因為張敬軒？
Kenny有落場跑。
隔咗冇幾耐後，Kenny終於喺IG解開呢個謎團，佢表示：「從十多年前參加歌唱比賽認識，然後約了十多次都沒有約成功的晚飯，然後今天在橫店馬拉松的開幕典禮碰見…你看我掛念你掛到心口都掛住個N字 #遊客到此一遊嘅pose #居然會在明清宮見 #nfornancy」
(on.cc)
