羅霖前年以50歲高齡推出寫真集，定價$250港幣都賣個滿堂紅，更獲英國《每日郵報》網上版激讚，可謂揚威國際。
今年51歲嘅溫碧霞(Irene)似乎要挑戰羅霖紀錄，準備喺今年6月推出《海潮》寫真集，早前遠赴塞班島取景，除咗常見嘅比堅尼，仲有床照，只用床單遮住身體，甚至只剩下內褲，意識非常大膽。
「海潮」對溫碧霞嚟講係事業高峰，寫真集同演唱會亦以此命名。
溫碧霞今日更在微博宣佈舉行開巡唱，首站就會喺香港，並定於6月19日會喺旺角麥花臣場館舉行《溫碧霞海潮演唱會2018》，票價分$480及$680兩種。溫碧霞接受周刊訪問時，透露計劃「退潮」！
溫碧霞表示今年會全力工作，出寫真、開演唱會之餘，仲會開拍一部自傳色嘅電影《我們的十八歲》，講述由幾歲到十幾歲嘅成長經歷。另外仲會同老公何祖光一齊開餐廳及花藝店，及推出自己品牌嘅紅酒。Irene在訪問中直言與老公分居一段時間後，彼此感情更勝從前，因為知道大家都好愛大家，現在明白家庭比事業更重;加上養子Xavier希望到美國升學，Irene亦計劃待Xavier中學時陪去一齊去美國，而自己就讀Art，希望試過簡單生活。
身在峇里島度假嘅溫碧霞今日接受傳媒訪問時話﹕「細個時好想開一間花店及餐廳，今年咁啱有咁嘅計劃，而紅酒，自己都鍾意紅酒，有自己嘅brand，呢三樣可以夢想成真好開心，最後一本寫真，喺50歲仲keep到咁俾自己好好回憶，同埋想告訴大家千祈唔好放棄自己夢想，結婚時曾經有段時間放棄自己嘅工作，有自己夢想同理想至最充實，喺呢世界上係要有貢獻，最近好忙拍緊兩部戲，五月要專心籌備演唱會。」
溫碧霞要在事業上衝刺，老公同仔仔都好支持。(微博圖片)
（Apple Daily）
