藝人林盛斌（Bob）日前透露7個月大嘅細仔林道申（Jaye）入咗醫院，呢幾日Bob同太太黃乙頤（Pearl）都忙於照顧囝囝。Pearl尋晚就喺社交網站交代Jaye嘅狀況，指囝囝中咗「人類間質肺炎病毒」，仲表示對家傭嘅不滿：「我每次餵四少食藥，個BB喊到拆天；個工人塊面黑到我好似餵毒藥咁，算點先？唔幫手都唔好影響我心情啦！我晚晚自己照顧到天光架（㗎）大佬。」
Bob嫂喺社交網大呻又要照顧囝囝，又要畀家傭黑面！（資料圖片）
湊仔唔好玩
今日參加羅力威及雨僑婚禮嘅Bob，喺社交網甫出Jaye嘅相，宣布阿仔已經出咗院，而相中嘅Jaye睇落仲好精靈添！Bob仲笑言叫大家唔好叫佢周圍去玩喇因為佢要湊B呀，佢扮囝囝留言：「好多謝咁多位哥哥姐姐嘅關心呀，我出咗院嘞，醫生要我喺屋企休息，咁多位老闆唔好call我爸爸應酬嘞，嗰d（啲）又開心又好玩嘅party唔好叫佢去，佢呢兩日要留喺屋企睇住我呀！」
Bob接受東網嘅訪問，問到太太喺社交網表達對於家傭不滿一事，Bob說：「其實姐姐（家傭）係OK嘅，呢幾日姐姐湊住BB都辛苦嘅，而且BB又病，其實大家都諒解嘅。」
工人太錫BB
之後Bob嫂都有喺社交網講番件事，佢澄清番工人姐姐點解黑面，佢話：「其實佢平時做嘢係冇乜大嘅錯誤，同埋佢好錫BB，就係因為佢太錫BB，所以佢見到我餵藥餵到個BB喊晒嘅時候，佢自己就心痛到塊面都黑埋，可能佢以為我虐待緊細佬仔（其實我個心都好痛架（㗎），但係唔可以表現出嚟，怕影響BB！）果（嗰）次之後我語重心長咁同佢講，解釋咗點解BB要食藥，之後佢個樣就好返（番）啲嘞」原來工人姐姐係太錫BB呀！
Bob仔勁精靈，Bob笑言唔好叫佢去應酬，佢要湊仔呀！
(on.cc)
