真係好低調！終於公開婚紗照，仲好開心咁話多謝大家嘅祝福。。。
曾演出經典韓劇《冬日戀歌》、《天國的階梯》嘅42歲女星崔智友，噚日突然宣佈閃嫁拍拖近一年嘅圈外男友，震驚演藝圈。而友姐就表示因顧及對方係圈外人，所以未有刻意公開結婚一事，僅邀請家人出席。友姐嘅婚禮亦貫徹低調，直到噚晚先透過所屬嘅YG事務所公開婚紗照，不過老公仍然只得背影出鏡。
友姐憑《天國的階梯》打開海外知名度，喺日本、大陸都好有人氣，友姐亦曾拍攝大陸劇《第101次求婚》及《城市戀人》。
對於友姐噚日爆婚訊，中、日兩地嘅媒體同樣大感驚訝，大陸粉絲亦紛紛湧到友姐嘅微博留言祝賀。雖然友姐噚晚先公開婚照，不過其實佢昨午5點半左右已經喺微博發文，以中文寫道「謝謝大家的祝福」感謝粉絲。
(蘋果日報)
