「城嫂」方媛（Moka）自從去年9月為郭富城誕下囡囡Chantelle後，昨晚首度現身公開活動，於中環出席頭髮護理品牌發佈派對，差不多成年冇見嘅Moka，着住4吋高高踭鞋現身，雖然已為人母，但Moka已明顯成功收身，同佢產前冇乜分別。
Moka喺台上分享一啲護髮心得，見到佢好似有啲緊張同拘緊咁，全程由城城經理人小美陪住。問到Moka係咪比較緊張，佢以普通話回答：「一點點。」然後佢話自己本來已經好鍾意呢個品牌，又用過呢隻產品，所以先會出席呢個活動，問到佢係咪被酬勞吸引？Moka話：「主要是幫朋友，錢方面不清楚。」而小美亦補充稱「唔講錢」，問到Moka係咪出席活動賺錢儲私己，佢坦言：「都有嘅。」但就唔肯講啲錢夠唔夠佢買手袋。
提到城城都有護髮品牌，今日Moka撐其他牌子，會唔會變咗打對台？佢就話：「不是，好的品牌我都支持。」咁會唔會幫城城個品牌拍廣告做生招牌？Moka話唔會。再問到Moka係咪要老公城城批准先可以出席活動，Moka話：「老公都尊重我喜歡的工作，支持我的，可是首要先照顧好家裏。」
至於會唔會再出活動，Moka坦言：「暫時未有，要先照顧好BB（Chant），偶然都會出席時尚活動，因為自己都很喜歡時尚的東西。」問到佢囡囡Chantelle係咪好得意？Moka話：「對呀，現在6個月，有15磅。（城城係咪好冧囡囡？）係，好喜歡！」
Moka仲爆老公爭住抱個女，而且佢大讚老公：「他是一個很好的爸爸，（會唔會呷醋？）不會，他都是喜歡BB，我也很疼她。」
已經收身變番產前咁上下身形嘅Moka透露，啱啱喺囡囡6個月大時停止餵母乳，自己現時重43公斤（約94.6磅），雖然佢好「夫唱婦隨」咁，話再生BB係天註定嘅事，但佢話兩公婆的確係努力不設房，亦有計劃再追BB。
問Moka係咪想追個仔，佢甜笑承認：「應該會啦！我自己都喜歡男孩子，（會唔會生越多越好？）不會，（生3個？）看老天啦！（會唔會生到追到仔為止？）不一定。」
講到為城城生女，有冇收到禮物？Moka話有，而且好多，不過因為佢唔特別鍾意鑽石嗰啲，最重視係份心意。講到下個月18號係佢哋結婚一周年紀念，Moka話未諗點樣慶祝，至於老公會唔會有驚喜，佢話：「他每逢節日，常常都會給我驚喜。」
(蘋果日報)
