【史上最爛演唱會】 遲到又忘詞！紐約個唱被嗌回水

台灣歌手楊宗緯上周六（24日）喺美國紐約開騷，本身有得同歌迷互動係開心事，點知完騷後卻被唔少觀眾投訴，指佢遲到、忘詞及只係唱咗7首歌，更有人鬧爆係「史上最爛演唱會」，並要求退票，引起網上熱議。

演唱會原定晚上7點開始，但有指楊宗緯遲大到，直至約晚上9點先上台唱歌，期間更曾經離場廿多分鐘，令全場觀眾愕然！楊宗緯被指從頭到尾都冇道歉，又頻頻失準忘詞，最後只係唱咗7首歌就完騷，因而被狠批個騷唔值票價，被強烈要求「回水」！

事後演唱會主辦方喺社交網發聲明，為未告知觀眾確實流程、以及工作人員簽證出現問題等道歉。主辦方面又解釋楊宗緯唔夠綵排時間，加上時差令佢忘詞，並指楊宗緯當晚曾落台與觀眾互動，增加表演時間及互動環節作出補償。