韓劇《鬼怪》35歲女星劉仁娜，於2011年拍攝韓片《Little Black Dress》與33歲女星朴寒星、32歲女星車藝蓮結緣，雖然事隔多年3人未有再合作，但三人感情依然好好，朴寒星噚日就喺Instagram上載與劉仁娜、車藝蓮嘅合照，令唔少粉絲表示「好懷念」。
《Little Black Dress》由(左起)尹恩惠、劉仁娜、車藝蓮及朴寒星主演
朴寒星上載合照時同時寫道，三人青春少艾時認識，但話題已經改變咗好多，又坦言三人就算好耐冇見都咁多嘢講，隨後朴寒星又怨劉仁娜冇IG，搞到上載新相都唔可以標籤佢，好不搞笑。隨後車藝蓮亦轉發呢張合照，並寫道「已經有兩個準媽媽」，即時引起粉絲留言催劉仁娜結婚生B。另外，車藝蓮與朱相昱因合作劇集《華麗的誘惑》而撻着，並於去年結婚，車藝蓮目前懷孕約6個月；而朴寒星去年11月自爆奉子成婚嫁圈外人，現時懷孕8個月。
(蘋果日報)
