生日好多時會祝福壽星年年有今日，歲歲有今朝，對於噚日40歲牛一嘅前無綫藝人、有線前主播劉家聰，今年生日意義重大，因為佢今年初發現有腦瘤，聽從醫生吩咐要立即安排入院做手術。
曾爲兒童節目擔綱，主持《放學ICU》和《至Net小人類》，又曾拍攝《法證先鋒II》、《創世紀》等劇集。
劉家聰一直活躍社交圈，樂於跟友人分享生活點滴，但1月18日忽然喺Instagram留言：「嚟到今日，日子已不多，我信我，正能量會戰勝一切。多謝我兄長Kelvin安排，好彩沿途有你。」
(劉家聰IG圖片)
佢冇交代發生咩事，過咗幾日Ig貼出剃頭相，劉家聰仲係笑住面對鏡頭，1月22日，已剃頭戴帽嘅佢又發文：「好…六點正需要起床啦！！萬事準備充足（其實已準備兩個星期）不論個人情緒及爆棚意志（因為我好幸福，有家人、兄長、朋友、老防兄弟、工友及中學同學等等），萬事俱備，整裝待發，上場打漂亮一仗，Fighting。」原來劉家聰腦有一個6厘米大嘅瘤，壓住左手左腳嘅神經線，必須要立即進行開腦手術，1月22日佢就一早入院，做咗長達7小時開腦手術，佢由手術室推出來，仲要留喺ICU觀察，農曆新年已出院返家跟妻女團聚，經過一個多月休息，佢身體康復進度理想。劉家聰近日再重返社交圈。
劉家聰腦有一個6cm瘤，1月22日佢就一早入院做七個鐘頭手術(劉家聰IG圖片)
「入到手術室，原來枱機器真係咁大，醫生同我講手術大約10個小時先完成，結果7小時搞掂，好順利。」手術前，劉家聰好清楚呢個開腦手術係高風險，「醫生話如果去到要10個鐘，開完腦，冚番頭骨就『乜嘢』㗎啦，醫生同我講會盡力，但成唔成功靠個天，好彩喺7小時提早完成，成個手術我失去600cc血，醫生係咗要同我輸血，結果都唔使，我由手術室推去ICU，我好快醒番。」
問到劉家聰會點形容呢次死過翻生嘅開腦大手術？佢話：「我『重生』，人好渺少(小)，身體少少病都會影響好大，今日我可以好番，係個天畀我『重生』，令我可以重新認識自己，即使幾熱愛工作，工作都要放輕鬆，有時追新聞真係好忙。」劉家聰勸喻大家要愛惜身體，佢o依家仍然每周要覆診，暫時要吃半年藥，佢身體狀況一天比一天好，佢都開始重新投入社交生活。
(劉家聰IG圖片)
佢慶幸做幕後太太一直用說話支持，囡囡也為爹哋打氣，有報道指佢患病時太太還擔起頭家，劉家聰話：「真係好感激太太同家人精神支持，病人係好需要說話安慰，至於經濟上，一家人無分你我，我一直都有好好理財觀念，健康比金錢重要。」
（Apple Daily）
