鍾楚紅、文詠珊(JM)、林嘉欣等噚晚喺中環出席LV傢俬系列展覽，剛宣佈懷有第四胎嘅張新悅腹大便便，拖埋老公楊哲安一齊現身。
提到下月1號就係好友張國榮逝世15周年，紅姑話：「佢成日喺我心入面，唔使咁多儀式，佢無處不在。」
紅姑透露之前去歐洲同熱帶地方旅遊，亦有重返與哥哥之前喺歐洲拍戲時到過嘅地方緬懷吓，紅姑仲話好鍾意巴黎，佢話：「嗰度天氣好，好多植物、花、展覽同博物館，去到唔會悶，會坐巴士地鐵，好自在，仲會着得好隨意去街市買餸。」
相反，喺香港去到邊都俾人認出，紅姑笑言有時會喬妝，冇人認得嘅時候就會開心周圍行。
同場嘅JM就恭喜前老闆黎明即將榮升爸爸，透露已經傳短訊恭喜Leon，不過自己都感到突然，佢仲大讚Leon話：「我覺得佢會係一個好爸爸，佢好細心，屋企有咁多寵物，就知道佢係一個好有愛心嘅人，期待佢BB。」放完假後JM喺5月就會返內地拍劇，佢仲話同男友感情隱定有默契，大家都喺內地工作時都會相約見面，認真sweet sweet！
(蘋果日報)
