佢自爆一生中只有９個月時間冇拖拍，只係身邊男伴車輪轉，始終都係唔啱：「同佢結婚應該係我走投無路。。。」
李蕙敏（Amanda）早前接受張學潤（Nel Nel）為奇妙電視主持嘅《我老友係明星》節目，二人識於微時無所不談。
Nel Nel笑指Amanda個樣太唔友善，Amanda話：「返學成日俾老師以為我係壞學生㗎啦，但喺老師眼中嘅好學生，放咗學又食煙又講粗口！」Nel Nel附和話：「做咗呢行完全明白人不可以貌相，好似大家公認、外表好清純果位玉女，私底下真係淫賤不能移！」兩人會意即放聲大笑。
Amanda入行多年經歷事業高低起伏，一曲《活得比你好》唱到街知巷聞，《我為我生存》專輯更拿下雙白金，不過當年喺頒獎禮上，就只得「最佳音樂錄影帶」獎，Amand苦笑話：「當時我真係黑咗面。」就係差少少運氣，Amanda最後都冇機會成為梅艷芳旗下嘅首位歌手，Amanda話：「我係阿梅鐵粉，讀書時成日唱佢啲歌，仲俾人叫我做梅艷芳添！後來阿梅想簽我入佢公司，可惜最後都未能成事。有冇遺憾？最遺憾係佢走咗，呢個係大家的嘅損失！」
相比阿梅，Amanda嘅情路就精采得多，佢自爆一生中只有９個月時間冇拖拍，只係身邊男伴車輪轉，始終夾唔來，直到遇上現任英籍丈夫Serge Micallef，Amanda笑笑口話：「同佢結婚應該係我走投無路，同咗咁多中國人都夾唔到，唯有試下外國人！」
Amanda喺2013年結婚，婚後嘗試人工受孕，可惜不果，如今47歲嘅佢話已經放棄：「我盡咗力，唔得都無辦法，你知人工受孕對女性傷害好大，會搞亂荷爾蒙，又會影響生活作息，所以我依家隨緣啦！」
(蘋果日報)
