兩年前再婚，仲再做爸爸，兩公婆向住BB車裡面嘅B女擠眉弄眼氹佢開心，又不時相視而笑，畫面sweet到完全令人融化，佢仲好貼心，番車善後摺好架BB車，一家三口真係超幸福～
56歲哈林（庾澄慶）兩年前與民視主播張嘉欣再婚，去年誕下千金，轉眼已經九個月大。
張嘉欣婚後淡出幕前，專心相夫教女，至於「老來得女」嘅哈林自是喜上眉梢。啱啱去完歐遊返台，趁今日氣溫回暖，即推住BB車，帶妻女出去曬太陽。今午近四時，哈林同張嘉欣推住BB車，步出敦化南路一品大廈，兩公婆向住BB車裡面嘅B女擠眉弄眼氹佢開心，又不時相視而笑，畫面sweet到完全令人融化。
一家三口散步往哈林位於大安路舊屋方向行，但未有上樓探哈林媽媽，而係去停車場攞車。只見哈林原來已經換咗佢架白色保時捷，變成TOYOTA七人車，而且好貼心咁先駛出架車，等老婆抱女上車，自己再落番車善後摺好架BB車。
出車未幾，哈林可能發現有傳媒跟蹤，所以行行停停又去大安森林公園附近兜圈，至於張嘉欣就疑似拎住兩隻襪氹個女，不時拍掌大笑，樂在其中。
(蘋果日報)
