佢透露第一胎其實都係意外，又踢爆老公原來一直向朋友宣揚一個夠晒數的好處，但獲知太太意外佗仔後，竟興奮至失控四處報喜，並開始為腹中兒子選小學。依家懷孕五個幾月。。。
現年40歲的蔣怡與珠寶設計師老公翁狄森育有現年4歲的囡囡翁容，翁容的出世已是一個意外，蔣怡說：「一直以來，翁生唔止自己實牙實齒話唔會再生，仲好似傳教咁說服啲朋友，佢會話做過調查和研究，事實證明一個小朋友係好啲，同父母關係好啲，父母會長命百歲全家幸福，同朋友可以講足三個鐘。有次佢同朋友坐港鐵講足全程，返嚟同我講，話今日成功說服到一個朋友喇！點知依家自打嘴巴，佢話要打畀朋友逐個道歉。」
興奮感爆發
蔣怡與翁狄森拍拖十多年，結婚5年，她完全了解老公個性，她自己也是獨生女，很明白獨生女沒有兄弟姐妹會有所缺失，當老公知道將有第二個BB來臨，再做爸爸的興奮突然爆發：「佢開心到失去理智，去朋友派對，我未宣布，佢見到朋友就宣布我佗仔，我成日叫佢控制吓自己！我哋拍吓拖，佢竟然係去男校小學嘅開放日，啲朋友見到我哋都好驚訝。」老公現在忙於為女兒選小學，心思都放在小學上，之前只看男女校或女校，現在則順便抽空看男校。
見食譜想嘔
有身孕5個多月的蔣怡，表示今胎佗得特別辛苦，懷孕頭4個月，不單止冇胃口，甚至反胃，莫說煮食連睇食譜都想嘔，她說：「我攞住本食譜，一路睇一路想嘔，睇住本書都唔得，更何況要煮？之前幫TVB煮餸，煮完都係搵經理人試食，我擺唔落口。我係廚師，好鍾意食嘢，但突然4個月冇晒食欲，仲要拍煮嘢食節目，好大壓力！」蔣怡指曾看過一齣美劇，劇情講述女廚師不知自己懷孕，對突然被客人投訴餸菜感到莫明奇妙，現時完全感同身受。
怕老公影得鹹濕
蔣怡上胎懷孕時曾拍大膽全裸照，預告今胎會影得更大膽，不過就講明唔會由老公操刀：「上次嗰輯好隨意，冇諗過影乜嘢造型，今次可能想有啲特別主題，但一定唔會畀老公操刀。佢有影其他女仔，我成日同佢講，我咁容易影得靚，你影我靚唔係你叻喎！同埋我老公太了解我，我反而想有啲唔同角度，佢太藝術家，費事佢影得我太鹹濕，成日叫我唔好着衫。」
(on.cc東網)
