下月就43歲嘅鄺文珣，去年底為製衣商人老公應德榮（Andrew）追女成功，兩公婆o依家共育有兩子一女，孻女Chesney總係拉心肝，兩個哥哥都視妹妹為小公主，全家錫到燶。
鄺文珣婚後以家庭為重，相夫教子，鄺文珣親手照顧囡囡，轉眼Chesney快6個月大，生得同媽咪餅印一樣，鄺文珣日前喺Instagram貼出孭住囡囡去公園郊遊相，Chesney仰後望實媽咪，而鄺文珣則低頭跟囡囡對望，照片滲出濃厚母愛。鄺文珣又用英文留言：「We have our own language. （我們有自己的語言）」相中嘅Chesney眼仔碌碌，十分精靈。
鄺文珣不時喺社交網分享幸福家庭相，佢會形容仔女就係佢嘅珠寶首飾，人哋晒名貴鑽飾同名牌包包，但鄺文珣就會樸素同子女合照。
(蘋果日報)
