華人置業前主席劉鑾雄（大劉）喺前年12月正式娶陳凱韻（甘比），甘比榮升做劉太，仲喺今年1月為大劉生咗佢哋嘅第三個小朋友。
雖然甘比貴為香港女首富，不過佢嘅生活仍然好貼地，唔單止親自管秀樺、仲學接送，又會經常帶住一對仔女周圍去吃喝玩樂，唔只一次見過親子邊行街邊食雪糕。
童心未泯嘅甘比，上年3月試過俾讀者見過佢單拖喺皇室堡嘅冒險樂園玩推公仔機，用咗20分鐘已經好多收穫，半年反就帶埋子女去再試身手。
噚日又有《蘋果》讀者Ashley，透過「爆相爆片」話見甘比同一對子女再戰冒險樂園，未見出世只有幾個月嘅孻女，讀者Ashley下晝行過皇室堡，已經見到甘比喺度玩，佢話：「保鑣好似人牆咁企喺佢哋後面，甘比好專心同一對仔女喺度玩，嗰陣商場人流唔係太多，所以都冇乜人留意佢哋。」
之前甘比主力玩推公仔機，今次係咪又去拎戰利品呢？讀者Ashley就話：「我見到阿女係要踩怪獸機，阿仔就玩射怪獸嘅遊戲機，阿女玩踩怪獸機嘅時候，甘比都有玩埋一份，仲玩得好開心，反而阿仔玩嘅時候，只係企埋一邊睇。」
(蘋果日報)
