當年憑《倩女幽魂》飾演「小倩」一角爆紅嘅王祖賢，貴為一代女神嘅佢已經息影仲移居去咗加拿大，好耐都冇喺幕前同大家見過面，唔少粉絲都話好掛住佢，王祖賢為咗畀粉絲知道佢嘅近況，久唔久都會放啲近照上社交網同大家分享吓佢嘅生活。
呢日王祖賢就放咗張中學時期打籃球嘅靚相，相中嘅佢雖然一臉青澀，不過仍然仙氣逼人，唔少網友都大讚王祖賢係「天生女神」。
相中王祖賢着住球衣面紅紅應該係啱啱打完籃球，企喺同學隔籬明顯高咗一截盡現佢嘅高挑身段，尖細鵝蛋面形配以濃眉大眼，真係靚到冇得輸！王祖賢現年51歲，佢讀中學時都已經三十幾年前嘅事，當年好肯定未有PS美圖絕技，相比起近年好多唔可以現真身，只可以係網上晒「靚相」嘅女神，網友都讚王祖賢天生麗質係真正嘅仙女。
(on.cc東網)
