之前接受過《蘋果》「閃耀人生女人心」專訪嘅袁詠儀（靚靚），曾經話過：「張智霖係唔會錯㗎！」所以今晚佢兩公婆拍住拖到君悅出席傑出領袖活動，一問到屋企邊個係領袖，靚靚即話：「一睇就知係我老公啦！佢最鍾意做領袖，雖然扮到唔係，但實際係佢囉。係假民主。」
記者笑靚靚話：「老公係唔會有錯嘅！」靚靚即話：「梗係唔會有錯啦！」張智霖即笑：「宗教一樣呀！」靚靚就答：「係呀，返嚟要跪拜0架！」咁囝囝有冇領袖天份？兩公婆齊聲答有：「佢有天蠍座嘅，就係話佢有指揮我哋嘅魅力。」指揮你哋做咩？張智霖話：「Anything。滑雪啦、想食乜嘢啦。」又笑：「其實我係做物流嘅，車出車入咁樣。」靚靚就話自己係經理人。
訪問期間靚靚兩度有電話入，第二次佢終於要聽：「我領袖打嚟呀。」一聽電話即「變晒聲」好溫柔咁啦。記者趁勢問張智霖：「靚靚有冇咁溫柔同你講電話？」佢話：「梗係冇啦，佢惡到乜嘢咁。」靚靚收線後即解釋：「其實係身教。我對佢有禮貌，佢先識點樣對人0架嘛！」又話：「我同ChiLam兒時就認識，如果我咁樣對佢（指溫柔），佢一定以為我有所要求囉。」張智霖補充：「鬼上身添呀！」
(蘋果日報)
