林峯同吳千語拍拖5年，近日傳出分訊後，有指吳千語同前政協施子清長孫施伯雄過從甚密，導致「峯語戀」分手收場，以為林峯飽受情傷，日日忙喺香港開工拍劇，原來林父早已安排對象俾林峯認識，呢個對象就係擁有34D上圍嘅大陸內衣模特兒張馨月，林峯上周五仲親自陪張馨月去海洋公園玩，掟公仔俾張馨月，而林峯父母亦有同行，睇嚟呢位新歡已見家長，並得到林家認同。
今日有周刊指，林峯上年底已認識張馨月，今年佢哋有一齊喺廈門過新年，林峯之後返港拍劇，張馨月都有同行，更喺IG貼咗唔少觀光相，據報道指林峯同千語BB分手後，林父安排阿仔去相睇飯局，27歲張馨月對林峯一見鍾情，有傳張馨月家人係林峯一位親戚嘅好友，所以先將二人撮合，由於戀情處於「萌芽階段」，林峯都好保護戀情，每次陪女友出外，佢都戴cap帽同口罩，打扮輕便，掩人耳目，被爆戀情後，張馨月即將IG由公開帳戶設為私人帳戶。
此外，有fans睇番林峯之前返廈門過年嘅相，發現當中有一張堂妹林夏薇同林峯嘅合照中，林峯垂下嘅手，食指戴上嘅戒指，同張馨月近日喺IG日常生活相中，所戴嘅戒指幾似，估計佢哋係「情侶戒」。
(蘋果日報)
