深得網友喜愛的藝人孫慧雪（雪雪）已完成結婚及生仔兩個人生階段，入行逾十年的她最近希望一圓做歌手的夢想，近日到日本北海道為新歌拍攝MV，配合自己名叫「阿雪」於是決定拍攝雪景，連續幾日在零下五度天氣身穿薄衫捱冷開工，期間幸運遇上大雪，鏡頭前有大量飄雪超唯美！
捱冷開工
不過，本身怕凍的雪雪有苦自己知，兼撞正生理期開工，捱冷兩小時後更凍傷腳，美腿變得紫色一撻撻，她說：「我喺一個水泉旁拍攝，啲服飾唔算太厚，拍咗兩個鐘，凍到成個人麻木晒，拍嗰陣好投入，到後期開始凍到震晒，對腳冇晒知覺，仲變咗紫紫地，當時我都好驚，大叫係咪要截肢㗎？走嘅時候自己唔夠力行落山，要邊行邊跣，都好多謝拍攝人員扶住我走，好照顧我！」雪雪連續幾天都由天光拍到天黑，又攰又凍又傷，不過認為絕對值得：「今次係我第一次睇到咁大雪，真係好靚，返到酒店暖番就冇咩事。」
囝囝唔肯瞓搵媽媽
自囝囝Riley出生後，雪雪都盡量接一些時間短的工作，今次是她首次出埠工作，自然對囝囝牽腸掛肚，一返酒店就要視像：「老公話BB係咁嗌媽媽，夜晚唔肯瞓覺，好慘咁，真係好掛住BB呀！」
為個MV，雪雪真係搏到盡！
好靚呀！
雪雪仲去埋雪地露營。
睇嚟雪雪真係好攰喎！
雪雪凍到隻腳冇晒知覺變咗紫紫地仲一撻撻添呀！
女神又點少得靚靚自拍喇！
注意保暖呀！
雪雪都話今次係有苦自己知。
飲熱嘢暖吓先。
好唯美！
(東方日報)
