37歲嘅容祖兒被爆同拍拖5年嘅劉浩龍（師兄）分手，報道一出大家都好關心。傳聞講到似層層，包括指祖兒因為唔想大病初癒嘅容媽媽擔心，所以一直隱瞞分訊。阿Sa亦表示支持祖兒決定。
噚日傍晚6時40分左右，一身鬆身白色長裙嘅祖兒到中環蘭桂坊出席活動，露出玉背，向在場記者展露甜笑，Joey接受訪問時，話自己心情幾好，問到係唔係放低咗，Joey煞有介事咁講：「你哋講嗰樣嘢，我唔回應，唔會回應。」咁即係分咗手？Joey再次話唔回應好啲，唔想講咁多，唔想之後有咁多新聞，佢解釋：「我一直嘅愛情生活都唔習慣同大家去講，留番俾自己去處理。」問到o依家嘅感情status係單身定係交往中，Joey笑言：「我嘅status係努力工作中，要多啲時間去工作。」
記者問到如果Joey一直唔講，外界會一直覺得佢就係劉浩龍女友，Joey話：「我覺得最好所有嘢都唔好講咁多，以我嘅經驗係講唔講大家都會繼續寫，我自己唔講咁多會好啲，多謝大家關心。」記者追問係唔係佢哋關係未有定案，Joey斬釘截鐵咁講：「我冇特別嘢要補充同交代，自己嚟緊都要錄兩隻碟，又要去台灣同大陸，師兄又要做演唱會，總之我哋互相努力、互相關心，支持大家就最緊要。」問到是否想之後多啲時間陪媽咪？祖兒都係嗰句：「我唔回應喇。」
講到老闆楊受成早於2012年，即兩人公告戀情之初，受訪時表明擔心祖兒同師兄呢段戀情，又指希望對方係真心愛祖兒，唔好有其他目的。祖兒今日再被問及此事，就謂：「冇其他目的，從來冇人對我有其他目的，大家都係愛錫我。」
傳媒問祖兒同師兄係咪好耐冇見？佢話唔係。當聽到有報道指兩人由年初已冇見面，祖兒搖了搖頭：「太誇張喇。」咁準備好迎接新戀情未？佢就話：「太多事情發生，我未處理到。努力工作先啦。」
不過今次爆出分手嘅時間啱啱同師兄開騷時間相近，故不少網民都質疑係咪「宣傳手法」，祖兒聞言似少少忟憎，反問傳媒：「你哋覺得咁，係得嘅咩？大家都係現代人，呢啲唔係我哋自己拎出嚟講嘅。總之我哋係互相支持嘅狀態。」再問之前係咪好大壓力？祖兒只表示：「唔回應咁多喇。」然後助手終止訪問。容祖兒喺活動後，約於晚上7點50分左右離開蘭桂坊，見門口有傳媒及歌迷守候，亦有笑著揮手，不過現場保安則阻檔歌迷接近祖兒，而祖兒登上之7人車，其後直駛去灣仔英皇駿景酒店。
(蘋果日報)
