楊千嬅喺好多年前因為一篇訪問，內容提到阿仔Torres鍾意女兒家嘅玩意，又話知道阿囝鍾意《冰雪奇緣》嘅Elsa公主，第一個反應係對住個仔鬧餐飽，搞到唔少網民鬧爆佢係「怪獸家長」，事後千嬅喺網上留言道歉，指自己係新手媽媽，有好多愚昧無知嘅憂慮，承諾放手俾囝囝去揀自己嘅喜好。
講到出做得到嘅千嬅，真係好放手俾Torres自己去揀，有時仲會陪埋阿囝一齊參與，噚晚千嬅喺ig貼圖，先係同阿囝去咗散步，仲話見到佢，所有煩惱痛苦不快全掃清，之後又貼咗一張相，原來佢想為阿仔製造驚喜：「很想畫些東西給Torres，明早，返學前給他一點surprise。」
千嬅畫咗白雪公主、米奇老鼠、小魚仙同幸運兔奧斯華嘅畫送俾阿仔，估唔到佢咁鬼畫得，連薛凱琪忍唔住留言讚千嬅係「Super Mom」，有網民仲話：「識Oswald唔難，但連女仔Ortensia都識畫先厲害！」
(蘋果日報)
