前港姐冠軍張名雅自去年3月誕下囝囝Mario後，就專心湊仔做個100分媽咪。
張名雅同老公去咗日本滑雪。
有仔萬事足嘅佢，仲不時都同網友分享囝囝嘅成長點滴。呢日張名雅就喺社交網Post咗一段囝囝彈琴片，仲留言：「爸爸媽咪係（喺）日本滑雪 ＠babymariochoy係（喺）香港自學彈琴。好勁啊。。。未夠一歲。。神童嗎？」片中，Mario好乖咁坐喺櫈上「叮叮叮」咁彈鋼琴，神情專注嘅佢仲要一啲都冇扭計，呢樣嘢對於未夠一歲嘅BB嚟講已經算好叻！
張名雅仲大爆自己佗緊Mario時日日播音樂做胎教，不過佢嘅胎教就有啲特別，因為佢成日聽韓團Big Bang嘅《Bang Bang Bang》，真係估唔到喎！名雅又透露依家都仲成日播音樂畀Mario聽，唔知係咪長期受到薰陶，Mario又真係勁有音樂細胞，就連網民都大讚佢不愧為星二代！
張名雅成日播音樂畀囝囝聽。
（on.cc）
