藝人羅仲謙到尖沙咀出席慈善活動。
羅仲謙明顯操得一身爆肌身形，西裝明顯被撐到脹卜卜，健碩身材無所遁形，他說：「我同張繼聰係同們師兄弟，大家同一個教練，依家一齊操fit，睇吓有冇機會去拍一個健身嘅旅遊特輯。（旅遊特輯係咪冇衫着？）唔會，最多特寫吓啲肌肉，希望可以同其他地方嘅藝人交流吓，唔係一定要比賽。（要操幾耐？）今次唔係要操大隻，係要操極致嘅線條，要操到好巔峰，依家完成咗一半。（同張繼聰邊個fit啲？）磅數比我強，我哋互相鼓勵，依家幾乎日日見，同見老婆一樣咁密。（戒口？）暫時唔使，仲要增磅。」
（資料圖片）
又被投訴唔喺屋企
羅仲謙透露今次操爆肌因為老婆楊怡嫌棄太瘦，不像以前好攬，他說：「停咗成年冇健身，之前老婆覺得我太瘦，話攬落去冇咗以前嗰啲感覺，咁我就同佢講，你唔好後悔，我一玩健身就會好瘋狂，佢依家開始投訴我成日下晝唔喺屋企。不過，脹卜卜好有安全感嘅感覺就快返嚟。」
（資料圖片）
(ON.CC)
