38歲嘅林峯同吳千語拍拖5年，最近由屢傳婚訊變分訊，不過兩個當事人都未有為事件表態。
噚日有讀者見到林峯現身海洋公園，佢身邊除咗有爸爸媽媽之外，仲有一個身型高䠷嘅女仔，成個格局好有相睇feel，之後《蘋果日報》記者喺海洋劇場附近見到林峯，嗰陣除咗林峯之外，仲有林峯嘅父母、嗰個身型高䠷嘅女仔、女友人，同埋兩個中年婦人，一行7人坐低睇表演。唔知林峯係咪好少睇，所以見佢睇得好投入，只係間中爸爸媽媽傾偈，之後佢哋又行咗去睇水母同埋行海洋館，經過啲攤位仲會掟吓波玩吓遊戲！
林峯陪屋企排隊等咗一個鐘頭纜車。 
行行吓幾好傾喎！
唔知呢個係唔係林峯嘅新歡呢？
林峯全程同嗰個身型高䠷嘅女仔保持距離兼避忌，只係喺人少嘅地方先傾偈。
記者即刻上前影相，聽緊電話嘅林峯好淡定咁俾大家影相，問到係咪有新戀情，林峯話：「唔係，全部都係親戚，我爹哋媽咪啱啱先走。」再問係咪新女友嘅時候，佢身邊一個女親友搶住話：「我係佢女朋友咁好呀？」跟住再問林峯有冇新戀情，佢就話：「哎吔！唔好煩我喇！你哋唔好影佢哋！」之後叫同行女友人送佢哋返去先，再自己一個人走。
反而嗰個身型高䠷嘅女仔反應比較大，用絲巾包住自己塊面兼左閃右避，搞到要同行中年婦人扶住佢落樓梯，之後索性戴咗頂太陽帽遮住自己塊面。經過一輪追問，佢未有透露同林峯有乜嘢關係，再問到佢哋有冇機會時候，身邊嘅中年婦人用普通話講冇機會。
（Apple Daily）
